Қасым-Жомарт Тоқаев Қазақстанда алдағы парламент сайлауы өтетінін мәлімдеді
Президент Қазақстанда жаз мезгілінде парламент сайлауы өтетінін хабарлады. Бұл туралы Мемлекет басшысы референдум алдындағы үгіт-насихат науқанына қатысқан жастар ұйымдарының өкілдерімен Қазмедиа орталығы студиясында өткен кездесуде айтты.
Президенттің айтуынша, өткен референдум ел тарихындағы маңызды оқиғалардың бірі болды. Сондай-ақ ол биылдан бастап 15 наурыз жыл сайын мемлекеттің басты құжаты – Конституция күні ретінде аталып өтетінін мәлімдеді. Мемлекет басшысы жаңартылған Ата заң ең прогрессивті конституциялардың бірі екенін атап өтті.
Президент жаңа Конституцияның болашаққа бағытталғанын және жастарға ерекше көңіл бөлінгенін айтты. Оның сөзінше, құжатта волонтерлік қызметті дамыту, ғылым мен инновацияны ілгерілету, сондай-ақ жасанды интеллектті қолдану сияқты бағыттар қамтылған.
Мемлекет басшысы ақпараттық науқанға белсенді қатысқан жас белсенділерге алғыс айтып, алда елді маңызды саяси кезең күтіп тұрғанын жеткізді. Ол алдағы парламент сайлауын бірлікпен өткізуге шақырып, жаңа құрамдағы заң шығарушы орган «жастар парламенті» болуы керектігін атап өтті.
