Қашаған кен орнын игеріп жатқан шетелдік компаниялар 20 шілдеге дейін Қазақстанға 2,3 трлн теңге көлеміндегі экологиялық айыппұлды төлеуі тиіс. Бұл туралы Әділет вице-министрі Даниэль Ваисов Астанада өткен брифингте мәлімдеді. Оның айтуынша, сот шешімі заңды күшіне енген. Егер белгіленген мерзімге дейін айыппұл төленбесе, мемлекет атқарушылық іс жүргізуді бастап, қаражатты мәжбүрлі түрде өндіріп алады. Сонымен қатар NCOC және мердігер компаниялар Қазақстанның әрекеттеріне қатысты Вашингтондағы халықаралық арбитражға жүгінген. Қазір арбитраждық трибуналдың құрамы жасақталуда. Экологиялық дау 2022 жылы Қашағанда рұқсат етілген 773 мың тоннаның орнына 1,7 млн тонна күкірт сақталғаны анықталғаннан кейін туындаған. Осыған байланысты компанияларға 2,356 трлн теңге көлемінде айыппұл салынған. NCOC өз кезегінде барлық экологиялық талаптар мен рұқсаттарды сақтағанын айтып, айыптаулармен келіспейтінін мәлімдеген.
