Иран АҚШ-тың кезекті жаппай әуе соққыларына жауап ретінде америкалық әскерилер пайдаланатын Бахрейн, Иордания және Кувейттегі нысандарға зымырандар мен ұшқышсыз ұшу аппараттары арқылы жаңа шабуыл жасады.
Ислам революциясы сақшылар корпусының мәліметінше, шабуылдың нысанасы Бахрейндегі Шейх-Иса әуе базасы, Иорданиядағы ханзада Хасан әуе базасы, сондай-ақ Кувейттегі АҚШ әскері орналасқан Әли әл-Салем және Ахмад әл-Жабер әскери базалары болған.
Иран тарапы ханзада Хасан әуе базасына жасалған соққы салдарынан жанармай қоймалары мен оқ-дәрі сақтау орындарында өрт шыққанын мәлімдеді. Алайда Иордания билігі бұл ақпаратты растаған жоқ. Елдің әуе қорғанысы күштері Иран аумағынан әуе кеңістігіне енген төрт зымыранды жойғанын ғана хабарлады.
Бахрейнде таңертең екі рет әуе дабылы жарияланды. Тұрғындарға қауіпсіз орындарға жасырыну ұсынылды. Дегенмен әуе базасына келтірілген залал туралы ресми ақпарат жарияланған жоқ.
Кувейт әскері әуе қорғанысы жүйелері әуе нысандарына қарсы жұмыс істегенін хабарлады. Билік тұрғындарға жарылыс дыбыстары әуе шабуылына қарсы қорғаныс жүйелерінің әрекетінен болғанын ескертті. Қазіргі уақытта қаза тапқандар мен ірі көлемдегі қираулар туралы ақпарат жоқ.
