Ақтауда алимент бойынша 37,8 миллион теңге қарызы бар азаматтың Toyota Land Cruiser автокөлігі өндіріп алушыға берілді. Бұл туралы Маңғыстау облысының прокуратурасы хабарлады.
Прокуратура мәліметінше, жыл басынан бері Ақтауда алимент алушылардың пайдасына 134,8 миллион теңге өндірілген.
Борышкерлермен жұмыс барысында екі автокөлік, екі пәтер және бір жер учаскесі тәркіленіп, өндіріп алушыларға берілген.
Соның ішінде 37,8 миллион теңге алимент қарызы бар азаматтың атына тіркелген Toyota Land Cruiser көлігі анықталған. Жеке сот орындаушысы жол талғамайтын көлікті 25,5 миллион теңгеге бағалап, қарызды өтеу есебінен алимент алушыға берген.
Тағы бір жағдайда алимент алушыға құны 13,4 миллион теңге болатын пәтердегі үлес табысталған.
Бұдан бөлек, табысын жасырғаны және ата-аналық міндеттерін орындаудан жалтарғаны үшін 46 борышкер әкімшілік жауапкершілікке тартылған. Тағы 11 адамға қатысты қылмыстық іс тіркелген.
