Премьер-министр Олжас Бектенов жылу маусымына дайындығы төмен өңірлерді сынады.
Үкімет басшысының айтуынша, мемлекет биыл энергетика нысандарын жөндеу мен жаңғыртуға 851 млрд теңге бөлді. Бұл – өткен жылмен салыстырғанда 60%-ға көп. Ал «Тарифті инвестицияға айырбастау» бағдарламасына 384 млрд теңге бағытталған.
Алайда қомақты қаржы бөлінгеніне қарамастан, Көкшетау, Теміртау, Жезқазған қалаларында, сондай-ақ Алматы және Солтүстік Қазақстан облыстарында жылу желілерін жөндеу қарқынына қатысты тәуекел бар.
Жылыту маусымына санаулы уақыт қалды. Мерзімді бұзған жауапты басшылардың жауапкершілігі қаралады. Энергетика министрлігіне әрбір осындай факті бойынша әкімшілік шара қабылдау тапсырылды.
