7 мыңнан астам жас қазақстандық Ұлттық ұлан қатарына қосылады. Күзгі шақыру науқаны 9 қыркүйек пен 15 қазан аралығында өтеді.
Биылғы алғашқы шақырылым Астанадан басталды. Елордадан 35 жас азамат Алматыдағы 5571 әскери бөліміне аттанса, Абай облысынан келген 20 сарбаз Астанадағы 5573 әскери бригадасында қызмет етеді.
Мерзімді әскери қызмет кезінде сарбаздар әскери дайындықтан өтіп, түрлі мамандықтарды меңгереді. Үздік сарбаздарға «Сарбаз 2.0» бағдарламасы арқылы тегін жоғары білім алу мүмкіндігі беріледі. Қазір 70-тен астам жоғары оқу орны Ұлттық ұланмен меморандумға қол қойған. Нәтижесінде жыл сайын 1 400-ден астам сарбаз білім грантына ие болады.
Әскери қызметін кәсіби жолға айналдырғысы келетін жастар мерзімді қызметтен кейін келісімшарт бойынша қызметін жалғастыра алады.
Бүгінде Ұлттық ұланның 7 мыңнан астам әскери қызметшісі еліміздің 21 қаласында қоғамдық тәртіп пен азаматтардың қауіпсіздігін қамтамасыз етуге жұмылдырылған. Биылғы алты айда олар 1,3 мыңнан астам тапсырма орындап, 6 мыңнан астам құқық бұзушыны полицияға жеткізген. Оның ішінде 151 адам қылмыс жасады деген күдікпен ұсталған.
