Үкімет отырысында Премьер-министр Олжас Бектенов Еңбек және халықты әлеуметтік қорғау министрі Аскарбек Ертаевпен елдегі жұмыспен қамту және еңбек нарығындағы ахуалды талқылады.
Еңбек министрлігінің мәліметінше, жыл басынан бері жұмыс берушілер электронды еңбек биржасына 845 мың бос жұмыс орнын орналастырған. Оның 432 мыңы – жұмысшы мамандықтар.
Портал арқылы азаматтардың 70 пайызына дейін жұмысқа орналасады. Алайда бос орындардың шамамен 30–40 пайызына маман табу қиын. Осыған байланысты кәсіпорындар жыл сайын еңбек тапшылығын жабу үшін 300 мыңға жуық шетелдік маманды тартуға мәжбүр.
Елде миллионға жуық бос жұмыс орны бар екенін естіген Премьер-министр әр азаматтың жұмыс табуына мүмкіндік бар екенін атап өтті. Оның айтуынша, кадр тапшылығы сыртқы еңбек миграциясы есебінен толықтырылып отыр.
Ол бұл ақпаратты халыққа кеңінен түсіндіруді тапсырды.
«Мұны халыққа түсіндіру керек! Елде “жұмыс жоқ” деген сөз болмауы тиіс. Ондай жоқ», – деді Олжас Бектенов.
