2027 жылдан бастап Қазақстанда әлеуметтік көмек азаматтардың табысы мен мұқтаждық деңгейіне қарай тағайындалады. Бұл туралы 14 қазанда Құрылтайдың пленарлық отырысында Премьер-министр Олжас Бектенов мәлімдеді.
Үкімет басшысының айтуынша, өз отбасын қамтамасыз етуге мүмкіндігі бар ауқатты азаматтар мемлекет көмегіне сүйенбеуі керек. Ал бюджет қаражаты шын мәнінде қолдауға мұқтаж адамдарға бағытталуы тиіс.
Бектенов әлеуметтік көмектің мақсаты азаматтарды тұрақты түрде жәрдемақыға тәуелді ету емес, қиын жағдайдан шығуға, жұмыс табуға және өз күнін өзі көруге көмектесу екенін атап өтті.
Үкіметтің есебінше, реформаның нәтижесінде 2027 жылы бюджет шығыны шамамен 700 миллиард теңгеге қысқаруы мүмкін. Ал үш жылдағы үнем 2,5 триллион теңгеге жуықтайды.
Әлеуметтік төлемдерді тағайындау кезінде отбасының әл-ауқатын бағалайтын 59 көрсеткіш ескерілмек.
