
Қазақстанда баспана алуды жеңілдететін жаңа ипотекалық бағдарлама әзірленіп жатыр. Енді үйдің бастапқы жарнасына пәтер құнының 10 пайызы жеткілікті болуы мүмкін.
Бұл мәселе қазір Өнеркәсіп және құрылыс министрлігі мен «Отбасы банк» арасында пысықталып жатыр.,-деді құрылыс және тұрғын үй-коммуналдық шаруашылық комитетінің төрағасы Бақытжан Жүнісбеков.
Жаңа тетіктің қаржылық моделі жасалуда. Ал бағдарламаның нақты шарттары келер жылы жарияланбақ.
Бастапқы жарнаны жинай алмай жүрген азаматтар үшін бұл маңызды жаңалық болуы мүмкін. Өйткені қазір баспана алуға ниеттілердің алдында тұрған негізгі кедергінің бірі – алғашқы жарна. Министрлік жаңа механизм арқылы осы талапты төмендетуді көздейді. Алдын ала жоспар бойынша, тұрғын үй құнының 10 пайызын жинаған азамат ипотека рәсімдей алады.
Алайда бұл әзірге дайын бағдарлама емес, талқыланып жатқан ұсыныс. Оның іске қосылуы бюджет мүмкіндігіне, жылжымайтын мүлік нарығындағы жағдайға және қаржы ұйымдарының ресурсына байланысты болмақ.
Бүгінде мемлекет азаматтарды баспанамен қамту үшін жеңілдетілген ипотека, жалдамалы тұрғын үй және пәтерақының бір бөлігін субсидиялау тетіктерін пайдаланып келеді. Енді солардың қатарына бастапқы жарнасы төмен жаңа ипотекалық құрал қосылуы мүмкін.
Дегенмен 10 пайыздық бастапқы жарна туралы жаңалыққа қазірден үміт артуға әлі ерте. Бағдарламаның пайыздық мөлшерлемесі, қатысу талаптары мен несие лимиті әзірге белгісіз. Нақты жауап 2027 жылы белгілі болады.





