Алматыда «Ғылым қоры» АҚ-ның ғылыми жобаларды коммерцияландыруға бөлген қаражатын жымқыру дерегі бойынша «Bal halal» ЖШС директорының тергеуі аяқталды.
2023–2024 жылдары компания өсімдік шикізатынан макарон өнімдері мен дәрумендерге байытылған ұн өндіретін төрт жобаны іске асыру үшін 1,15 млрд теңге алған. Алайда сатып алынған жабдықтар жоспарланған өнімді өндіруге жарамсыз болып шыққан.
Тергеу мәліметінше, 736,4 млн теңге күдіктімен байланысы бар компаниялардың есепшоттарына аударылып, заңсыз айналымға шығарылған. Мемлекетке келтірілген жалпы шығын 945 млн теңгені құраған.
Күдікті қамауға алынды. Сот санкциясымен жалпы құны 830 млн теңге болатын 5 жер телімі, 4 автокөлік, Астанадағы пәтер, коммерциялық нысан және зергерлік бұйымдарға тыйым салынды.
