Қазақстанда жұмыспен қамтуға жәрдемдесу жүйесін проактивті форматқа көшіру жоспарланып отыр. Яғни, жұмыссыз азамат енді бос жұмыс орындарын өзі іздеп, мансап орталығына жүгінудің орнына, жасанды интеллект арқылы цифрлық жүйеден өзіне сәйкес жұмыс ұсыныстарын алады.
Бұл туралы Үкімет отырысында Еңбек және халықты әлеуметтік қорғау министрі Асқарбек Ертаев мәлімдеді.
Жұмыс адамның өзін іздейді
Жаңа жүйе жұмысқа орналасуды қажет етуі мүмкін азаматтарды автоматты түрде анықтап, олардың деректерін жұмыс берушілердің өзекті сұраныстарымен салыстырады. Содан кейін азаматқа сәйкес келетін бос жұмыс орындары ұсынылады.
Хабарламалар eGov және Enbek.kz мобильді қосымшалары арқылы, сондай-ақ 1414 нөмірінен SMS түрінде жіберілуі мүмкін.
Жасанды интеллект жұмыс іздеушінің жеке ерекшеліктерін ескеріп, тек өз өңіріндегі емес, елдің басқа аймақтарындағы бос жұмыс орындарын да ұсына алады.
Әсіресе жұмыс берушілер арасында тұрақты сұранысқа ие жұмысшы мамандықтарына басымдық берілмек.
Қажет болған жағдайда жүйе азаматқа тек жұмыс ұсынып қана қоймай, оқу немесе қайта даярлау курстарын да ұсынады. Сондай-ақ кадр тапшылығы бар өңірлерге қоныс аудару бағдарламаларына қатысу мүмкіндігі қарастырылады.
Сервис қазірдің өзінде сынақтан өтіп жатыр
Жасанды интеллект қолданылатын «Цифрлық жұмыспен қамту қызметі» пилоттық жобасы Павлодар облысында іске қосылды.
Мемлекеттік органдар бұл жүйені азаматты жұмысқа деген қажеттілігін анықтаудан бастап, тұрақты жұмысқа орналасуына дейін жеке сүйемелдейтін құрал ретінде қарастырып отыр.
Бұған дейін Еңбек министрлігі цифрлық жұмыспен қамту қызметін Маңғыстау облысында да пилоттық режимде іске қосуды жоспарлап отырғанын хабарлаған. Кейін сервисті еліміздің басқа өңірлеріне де енгізу көзделіп отыр.
Мұндай мүмкіндіктерге қолжетімділікті мобильді цифрлық сервистер арқылы да кеңейту жоспарланған.
Осылайша, мемлекет азаматтың қажетті қызметті өзі іздейтін жүйеден адамның қажеттілігін алдын ала анықтап, оған дайын шешім ұсынатын модельге біртіндеп көшпек.
Жасанды интеллект басқа салаларда да қолданылады
Еңбек министрлігінде жасанды интеллект тек жұмыс іздеуге көмектесіп қана қоймайды.
Алдағы уақытта технологияларды:
- жұмыспен қамту шараларын ұсыну;
- қандас мәртебесімен жұмыс істеу;
- кәсіби еңбекке қабілеттіліктен айырылу дәрежесін бағалау;
- зейнетақы тағайындау кезінде құжаттарды өңдеу бағыттарында қолдану жоспарланып отыр.
Сонымен қатар жасанды интеллект сканерленген еңбек кітапшаларындағы ақпаратты тануға, жасына байланысты зейнетақы тағайындау кезінде ұсыныстар әзірлеуге және кәсіпорындардағы еңбек қауіпсіздігі мен жағдайларына қатысты ықтимал тәуекелдерді анықтауға көмектеседі.
Министрліктің мәліметінше, цифрлық құралдарды дамыту мемлекеттік қызметтерді нақты адамға бағыттап, азаматтың жұмысқа деген қажеттілігі пайда болған сәттен бастап нақты ұсыныс алғанға дейінгі уақытты қысқартуға мүмкіндік береді.
