Қазақстанда мектептердің санитарлық жағдайы мен оқушылардың тамақтану сапасына бақылау күшейтіледі. Бұл туралы Үкімет отырысында Премьер-министр Олжас Бектенов тапсырма берді.
Мектептерде мыңдаған заңбұзушылық анықталған
Денсаулық сақтау министрлігінің мәліметінше, санитарлық мониторинг барысында білім беру ұйымдарына анықталған кемшіліктерді жою үшін 8,4 мың нұсқама берілген. Сондай-ақ мамандар 287 жедел шара қабылдаған.
13 тамыздағы жағдай бойынша нұсқамалардың 82,8%-ы орындалған. Яғни 6961 білім беру нысанындағы заңбұзушылықтар жойылған.
Бектенов балалардың толыққанды дамуы мен сапалы білім алуы қауіпсіз ортаға және мектептердегі сапалы, теңгерімді тамақтануға тікелей байланысты екенін атап өтті.
Премьер-министр Денсаулық сақтау министрлігі мен өңір әкімдіктеріне санитарлық талаптардың сақталуын және мектептердегі тамақтанудың ұйымдастырылуын бақылау жұмыстарын жалғастыруды тапсырды.
