9 қарашадан бастап Қазақстанның республикалық маңызы бар үш автожолында көліктердің орташа жылдамдығын анықтайтын жаңа жүйе іске қосылады. Бұл туралы «ҚазАвтоЖол» ұлттық компаниясы хабарлады.
Жаңа бақылау жүйесі Алматы – Қорғас, Қарағанды – Бұрылбайтал және Қызылорда – Арал бағыттарын қамтиды.
Жүйенің ерекшелігі – көліктің жылдамдығын бір нүктеде ғана емес, жолдың белгілі бір бөлігін толық жүріп өткен уақыт бойынша есептейді. Камералар көліктің бақылау аймағына кірген және шыққан уақытын тіркеп, орташа жылдамдығын автоматты түрде анықтайды. Белгіленген шектен асқан жағдайда, құқық бұзушылық туралы ақпарат тиісті органдарға жіберіледі.
Бақылау орнатылатын учаскелер:
Алматы – Қорғас: Ұйғыр – Панфилов аралығы. Ұзындығы – 50,8 шақырым. Рұқсат етілген жылдамдық – 120 км/сағ.
Қарағанды – Бұрылбайтал: Шұбартүбек – Гүлшат (42,1 шақырым) және Гүлшат – Тасарал (42,5 шақырым). Жылдамдық шегі – 140 км/сағ.
Қызылорда – Арал: Ақжарма – Ақжар (48,2 шақырым), Ақжар – 103-разъезд (122,4 шақырым), 103-разъезд – Әйтеке би (95,8 шақырым). Жылдамдық шегі – 100 км/сағ.
ҚазАвтоЖолдың хабарлауынша, жаңа жүйенің мақсаты – жүргізушілердің жол тәртібін сақтауын қамтамасыз ету және қалааралық тасжолдардағы жол-көлік оқиғаларын азайту
