Қазақстан мен Иордания уран саласында бірлескен кәсіпорын құратын болды. Бұл жайында Ақордада қазақ басшысы Қасым-Жомарт Тоқаевтың Иордания Королі II Абдалла бен әл-Хусейнмен кездесу рәсімінде мәлім болды.
«Самұрық-Қазына» АҚ басқарма төрағасы Нұрлан Жақыповтың айтуынша, «Қазатомөнеркәсіп» пен Иорданияның JUMCO компаниясы арасындағы келісімге сәйкес, 2026 жылдың соңына дейін бірлескен кәсіпорын құрады. Қазақстан Иордания аумағында уран кен орнын игерумен айналысады. Егер бұл жұмыстар оң нәтиже берсе, ортақ кәсіпорын құрылады. Оның 70% үлесі – «Қазатомөнеркәсіпке», 30%-ы – Иорданияның ұлттық компаниясына тиесілі болады», – дейді «Самұрық-Қазына» АҚ басқарма төрағасы.
Сондай-ақ, Жақыпов Қазақстан мен Иордания арасында тікелей әуе рейсін ашу жоспары барын айтты . Қазір тиісті келіссөздер жүріп жатыр. Қазақстан Иорданияның дрон құрастыру саласына да қызығушылық танытып отыр. Цифрлық даму инновациялар және аэроғарыш өнеркәсібі министрі Жаслан Мәдиевтің айтуынша, Иордания азаматтық та, әскери дрондар да шығарады. Дронға қарсы жүйесі де бар. Иорданияда дрон саласы жақсы дамыған. Министр бірнеше ай бұрын Иорданияға барып олардың дрон саласын зерттеген. Дрон дизайнын, дрондарды құрастыру зауытын, ақпараттық жүйелерін, қосымшаларын көрдік. Олар осы тәжірибелерімен бөлісуге дайын, — деді ол.
Иордания Королінің елімізге ресми сапары барысында көлік, энергетика, логистика, ауыл шаруашылығы, IT және цифрландыру, сондай-ақ денсаулық сақтау мен фармацевтика салаларында да келісімдерге қол жеткізу көзделген.
