Қазақстан Республикасының Атом энергиясы жөніндегі агенттігі төрағасы Алмасадам Сәтқалиев Сильван Гиоге мырзамен кездесу өткізді.
Келіссөздер барысында тараптар атом энергиясын бейбіт мақсатта пайдалану, ядролық ғылым мен технологияларды дамыту, сондай-ақ ядролық және радиациялық қауіпсіздікті қамтамасыз ету бағытындағы екіжақты ынтымақтастықтың қазіргі жай-күйі мен болашағын талқылады.
Агенттік төрағасы Қазақстан мен Франция арасындағы стратегиялық әріптестіктің жоғары деңгейін атап өтіп, Францияның бейінді мемлекеттік құрылымдары және атом саласындағы жетекші компанияларымен өзара іс-қимылды кеңейтудің маңыздылығына тоқталды.
Өз кезегінде Франция Республикасының Төтенше және Өкілетті Елшісі француз тарапының Қазақстанмен ынтымақтастықты тереңдетуге мүдделі екенін растады. Атап айтқанда, атом энергетикасы, ғылыми зерттеулер, кадр даярлау және озық технологиялық шешімдерді енгізу бағытындағы бірлескен жобаларды іске асыруға дайын екендігін білдірді.
Кездесу қорытындысы бойынша тараптар өзара тиімді серіктестікті одан әрі кеңейтуге, институционалдық диалогты нығайтуға және бейбіт атомды дамытуға бағытталған бірлескен бастамаларды жүзеге асыруға уағдаласты.
