Бірыңғай жинақтаушы зейнетақы қоры 2026 жылғы қаңтар айындағы жағдай бойынша ай сайынғы төлемдер көлемін жариялады. Tengrinews.kz сауалына жауап берген қор мәліметінше, жинақтаушы зейнетақының мөлшері азаматтың зейнетақы жинағының көлеміне және жүйеге қатысу өтіліне тікелей байланысты.
Қор деректеріне сәйкес, төлемдердің ең жоғары мөлшеріне шектеу қойылмаған: жинақ көлемі қаншалық көп болса, ай сайынғы зейнетақы да соғұрлым жоғары болады.
2026 жылғы 1 қаңтардағы жағдай бойынша қордан төленетін зейнетақы мөлшері айына 32 360 теңгеден 900 мың теңгеден астам сомаға дейін жеткен. Осылайша, еліміздегі ең жоғары жинақтаушы зейнетақы 900 мың теңгеден асты.
Қор түсіндіргендей, жинақтаушы зейнетақы мына көздер есебінен қалыптасады:
• міндетті зейнетақы жарналары (табыс көлемінің 10%-ы),
• жұмыс берушінің міндетті жарналары,
• кәсіптік және ерікті жарналар,
• инвестициялық табыс.
2026 жылдың басында жинақ құрылымындағы инвестициялық табыстың үлесі 41,4% болды.
Зейнетақы төлемдерінің мөлшері белгіленген әдістеме бойынша есептеледі:
алғашқы жылы жинақ сомасының 6,5% мөлшерінде төлем жасалады, кейін жыл сайын төлемдер 5% көлемінде индекстеледі.
Қор мамандары негізгі факторлар ретінде тұрақты жарна аудару мерзімі мен азаматтың ресми табыс деңгейін атады.
Контекст
Бұған дейін Қазақстан Республикасының Еңбек және халықты әлеуметтік қорғау министрлігі мәліметінше, 2026 жылғы 1 ақпанда еліміздегі жиынтық зейнетақының орташа мөлшері 157 843 теңгені құрады. Оның ішінде:
• ынтымақты зейнетақы — 103 931 теңге,
• базалық зейнетақы — 53 912 теңге.
2026 жылғы 1 қаңтардан бастап Қазақстанда барлық мемлекеттік жәрдемақылар, сондай-ақ базалық және ынтымақты зейнетақылар 10%-ға индекстелді.
