Қазақстанда көмір бағасының біртіндеп қымбаттауы күтілуде, алайда жақын арада бағаның күрт өсуі болжанбайды. Бұл туралы Үкіметте өткен брифингте Энергетика вице-министрі Сұңғат Есімханов мәлімдеді.
Оның айтуынша, алдағы жылыту маусымында көмір бағасы тұрақты болады.
«Биылғы қыста бағаның өсуі күтілмейді, өйткені тұтыну көлемі біртіндеп артады», — деді Есімханов.
Сонымен қатар, министрлік алдағы уақытта көмір бағасының қымбаттауы мүмкін екенін жоққа шығармайды. Бұл көмір саласын жаңғырту және өндіру көлемін арттыру жоспарларымен байланысты.
Вице-министрдің түсіндіруінше, көмір өндіруші кәсіпорындар өндірісті дамыту үшін инвестиция қажет екенін мәлімдеген. Қосымша шығындар түпкілікті отын бағасына әсер етуі мүмкін.
Дегенмен ведомство өкілінің айтуынша, бағаның өсуі бақылауда болады және нарықта күрт өзгерістерге әкелмейді.
