Қазақстанда Құрылтайдың өкілеттігін кеңейту ұсынылып отыр. Атап айтқанда, оған Үкімет мүшелерін қызметтен босату мәселесін бастамалау құқығын беру көзделуде. Конституциялық реформа жөніндегі комиссия отырысында Сенат депутаты Нұрлан Бекназаров болашақ Конституциялық заңда Құрылтайдың қызмет тәртібі мен өкілеттіктерін бекіту жоспарланып отырғанын айтты. Құрылтайға Қазақстан Президентінің сайланғанын жариялау, республикалық референдум өткізуге бастамашылық жасау, сондай-ақ вице-президент пен Премьер-министрдің тағайындалуын көпшілік дауыспен бекіту құқығын беру ұсынылады.
Сонымен қатар, Құрылтай депутаттары Жоғарғы сот судьяларын сайлап, олардан ант қабылдап, Президенттің ұсынуымен қызметтен босата алады.
Конституциядағы Мәжіліс депутаттарының Үкіметке сенімсіздік білдіру құқығын Құрылтайға беру ұсынылмақ.
Жоғары аудиторлық палатаның есебі қабылданбаған жағдайда, бұл Үкіметке сенімсіздік білдіру болып саналатынын депутат ерекше атап өтті.
