2 наурыз таңертең Иран Израильге және Парсы шығанағының бірнеше еліне жаңа ракеталық соққылар жасады. Жарылыстар Дубай, Доха және Манама қалаларында тіркелді, деп хабарлайды Reuters басылымы куәгерлер мен тілшілерге сілтеме жасап.
Дәл сол уақытта израиль әскерилері Иран тарапынан ракеталар ұшырылғанын хабарлады. Олардың дерегі бойынша, әуе қорғаныс жүйелері мақсаттарды ұстап алу үшін іске қосылды. Ел тұрғындарына төтенше ескерту хабарламалары жіберіліп, дереу баспанаға өтіп, қосымша нұсқаулар шыққанға дейін сол жерде болу ұсынылды. Иерусалимде де ракеталық дабыл жарияланғаннан кейін бірнеше жарылыс тіркелді.
Кувейт астанасының аумағында, АҚШ елшілігі орналасқан жерде қара түтін бағаны көрінгені хабарланды. Елшілік азаматтарды ғимаратқа жақындамауға және қауіпсіз орындарға паналауға шақырды. Қаладағы тұрғын кварталдарда жергілікті билік қатты дыбыстар әуе қорғаныс жүйесінің ұшқышсыз аппараттарға қарсы жұмысымен байланысты екенін түсіндірді.
Ливан бағыты бойынша да жағдай ушығып отыр. 2 наурыз таңертең Ливан аумағынан Израильдің солтүстігіне оқ атылған. Ракеталық шабуыл үшін жауапкершілік Иран қолдайтын «Хезболла» ұйымына жүктелді. Израиль армиясы Ливан аумағына жауап соққыларын жасады. Ливан үкіметінің дерегі бойынша, 31 адам қаза тауып, 149 адам жарақат алған. Израиль армиясының Солтүстік округ командирі Рафи Мило соққылардың қарқындылығын арттыру niетінде екенін мәлімдеді.
Алдынғы күні АҚШ Президенті Дональд Трамп Иранның жаңа басшылығы Вашингтонмен келіссөз жүргізуге ниет білдіруі мүмкін деп айтқан, бірақ Тегеранда бұл ақпарат жоққа шығарылды. Иран Ұлттық қауіпсіздік жоғарғы кеңесінің бас хатшысы Али Лариджани әлеуметтік желіде елдің АҚШ-пен келіссөз жүргізуге ниеті жоқ екенін хабарлады.
Қақтығыстың күшеюіне байланысты авиакомпаниялар кем дегенде 1239 рейсті тоқтатты. Дубай халықаралық әуежайы сияқты Таяу Шығыстың ірі әуежайлары үшінші күн қатарынан жабық. Жүздеген мың жолаушы ұшу кестесіндегі үзілістерге тап болды. Трамп сонымен қатар әскери операция төрт аптаға дейін созылуы мүмкін екенін мәлімдеді.
