Ел үкіметі масылдықпен күресуді қолға алды. Премьер-министр Олжас Бектенов әлеуметтік әділеттілікті сақтап, масылдық пиғылды азайту үшін шаралар қабылдайтын айтты. Үкіметтің отырысында Еңбек және халықты әлеуметтік қорғау министрлігіне мүдделі мемлекеттік органдармен және әкімдіктермен бірлесіп, осы жылдың 1 желтоқсанына дейін әлеуметтік қолдау шараларының барлық өңірге арналған бірыңғай стандартын әзірлеуді тапсырды. Жалпы ел бюджетінің шығыс бөлігінің 40 пайызын әлеуметтік төлемдер құрайды. Оның ішінде зейнетақы, мүгедектігі үшін алатын жәрдемақылар, бала туғанда берілетін төлемдер және атаулы әлеуметтік көмек бар. Енді үкімет жұмыссыз отырмын деп көмек алып отырғандардың шаруасын реттемек. Күмәнді әлеуметтік төлемдер жойылады.
— Еңбек министрлігі мүдделі мемлекеттік органдармен және әкімдіктермен бірлесіп, осы жылдың 1 желтоқсанына дейін әлеуметтік қолдау шараларының барлық өңірге арналған бірыңғай стандартын әзірлеуі қажет. Барлық күмәнді және тиімсіз әлеуметтік төлемдер мен жәрдемақыларды алып тастау керек. Біз әлеуметтік әділеттілікті сақтап, масылдық пиғылды азайту үшін шаралар қабылдайтын боламыз. Үкіметтің міндеті — барлығына бірдей жағдай жасау, ал азаматтар жұмыс істеп, өзін және өз отбасын асырауға ұмтылуы керек.
Ал кешегі Жолдауында Президент дәл осы мәселені көтерген еді. Қасым-Жомарт Тоқаев Үкімет кемінде 15 жыл бойы әлеуметтік масылдық пен алаяқтыққа жол беріп отыр дегенді.
— Кезінде біздегі «әлеуметтік саланың жанашырлары» толық емес отбасы деген жеңілдікке мұқтаж адамдар санатын ойлап тапқан еді.Соның салдарынан, ажырасқан отбасылар саны күрт өсіп, біз бір кезде бұл көрсеткіш бойынша әлемде «көш бастаған» елдердің қатарына қосылдық. Мұндай мысалдар аз емес. Осылайша, біз өзіміз жалқаулық пен масылдыққа жол беріп отырмыз. Отбасы мүшелерінің барлығы дерлік нысаналы әлеуметтік көмек пен жәрдемақы алатын болса, жұмыс істеудің не қажеті бар? Турасын айтсақ, әлеуметтік салада оңтайлы шешім қабылдаудың орнына, Үкімет кемінде 15 жыл бойы әлеуметтік масылдық пен әлеуметтік алаяқтыққа жол беріп келді.
