Сенат төрағасы Мәулен Әшімбаев жаңа Конституция күшіне енгеннен кейін вице-президент қызметіне тағайындалуы мүмкін деген пікірлерге қатысты түсініктеме берді. Бұл жайында спикер сенатта өткен брифингте айтты.
Оның айтуынша, мұндай талқылаулар қоғамдық пікірді басқа арнаға бұрып, нақты негізге ие емес.
«Егер азаматтар референдумда жаңа Конституция жобасын қолдаса, барлық кадрлық шешімдер оның нормаларына сәйкес қабылданады», — деді Сенат спикері.
Әшімбаев мемлекеттік қызметке тағайындау мәселелері Президенттің құзыретіне жататынын атап өтті. Атап айтқанда, кандидатураларды Құрылтай қарауына енгізу және басқа да кадрлық шешімдерді қабылдау — Мемлекет басшысының өкілеттігі.
«Бұл — Президенттің прерогативасы. Осы мәселеге қатысты пікір білдіруді орынсыз деп санаймын», — деді ол.
Сондай-ақ Сенат төрағасы жоғарғы палата өкілеттігі тоқтатылғаннан кейін ел игілігі үшін кез келген бағытта жұмыс істеуге дайын екенін жеткізді.
Еске салайық, қаңтар айында Қасым-Жомарт Тоқаев Қазақстанда вице-президент лауазымы енгізілетінін мәлімдеген болатын. Сонымен қатар мемлекеттік кеңесші институтын тарату жоспарланып отыр.
