Астанада туған Ақжан атты сирек түсті ақалтеке байтал әлеуметтік желі қолданушыларының қызығушылығын тудырды. Ғанатлы мен Табыс есімді таза қанды ақалтекелерден туған жылқы ерекше қылаңбоз түсімен көпшіліктің назарын аударып отыр.
Мамандардың айтуынша, мұндай түс өте сирек кездеседі. Қазақ дүниетанымында қылаңбоз жылқы ежелден ақжолтайлықтың, береке мен жақсылықтың нышаны саналған.
Мәдениеттанушылар жылқының қазақ тарихы мен мәдениетіндегі орны ерекше екенін айтады. Ботай мәдениетінің археологиялық деректері қазіргі Қазақстан аумағында жылқы алғаш қолға үйретілгенін дәлелдейді. Сондықтан Ақжан тек әсем жануар ғана емес, Ұлы даланың бай мұрасын жалғастырып тұрған ерекше символ ретінде бағаланып отыр.
Желі қолданушылары Ақжанның суреттерін кеңінен бөлісіп, оны Астананың жаңа бейресми символы деп атап жатыр.
