Қымбатты достар!
Менің қатысуыммен болған жол-көлік оқиғасына қатысты әлеуметтік желіде түрлі әңгіме мен болжам тарап жатыр. Өкінішке қарай, олардың бәріне жауап бере алмаймын.
Іс бойынша сотқа дейінгі тергеу жүріп жатыр. Мен және жұбайым тергеу құпиясын жария етпеу туралы қолхатқа қол қойдық. Сондықтан қазір істің мән-жайына қатысты толық ақпарат бере алмаймын.
Қазіргі таңда қажетті сараптамалар жүргізілуде. Тергеу органдары болған жағдайға заң аясында объективті әрі әділ баға береді деп сенемін.
Мен үшін дәл қазір ең маңыздысы — жол апатынан зардап шеккен азаматтың жанынан табылып, оның жақындарына қолдау көрсету. Бірнеше күннен бері оның туыстарымен бірге сауығып кетуін тілеп, алаңдап отырмыз.
Оған шұғыл медициналық көмек көрсеткен аудандық аурухана дәрігерлеріне, Денсаулық сақтау министрлігіне және облыстық денсаулық сақтау басқармасына алғыс айтамын.
Әлеуметтік желідегі әр ақпаратқа сене бермеуге, асығыс шешім жасамауға шақырамын. Шындықты тек ресми ақпарат пен тергеу нәтижесі көрсетеді.
«Біз үшін алаңдап, қолдау білдіріп жатқан баршаңызға рақмет!» – деп жазды ол Facebook-тегі парақшасында.
Еске сала кетейік, Жамбыл облысының Рысқұлов ауданында жол-көлік оқиғасы болып, қылмыстық іс қозғалды.
Toyota көлігінің жүргізушісі жолда тұрған 36 жастағы ер адамды қағып кеткен. Зардап шеккен азамат аудандық аурухананың жансақтау бөліміне жеткізілді.
Желіде көлік тізгінінде экс-депутат Бақытжан Базарбек болғаны туралы ақпарат тарағанды. Бүгін экс-депутат бұл ақпаратты растап,мәлімдеме жасады.
