Қазақстан Ұлттық банкі базалық мөлшерлемені қайта төмендету туралы шешім қабылдады. 4 қыркүйектен бастап базалық мөлшерлеме жылдық 16,25% деңгейінде белгіленді. Пайыздық дәліз ±1 пайыздық тармақты құрайды.
Бұған дейін базалық мөлшерлеме шілде айында 16,75%-ға дейін төмендетілген болатын.
Неліктен мөлшерлеме төмендетілді?
Ұлттық банк шешім қабылдау кезінде макроэкономикалық бағалауларды, жаңа болжамдарды және инфляцияға әсер ететін тәуекелдерді ескерді.
Негізгі факторлардың бірі – баға өсімінің баяулауы. Тамызда жылдық инфляция 9,8%-ға дейін төмендеді. Ұлттық банктің мәліметінше, дезинфляция процесі 11 ай қатарынан жалғасып келеді.
Азық-түлік инфляциясы 9,5%-ға дейін төмендеді. Бұған жеміс-жидек пен көкөніс бағасының арзандауы және импорттық өнім құнының төмендеуі әсер еткен.
Азық-түлікке жатпайтын тауарлар бағасының өсімі 11,4%-ға дейін баяулаған. Қызмет көрсету саласындағы инфляция да 8,9%-ға дейін төмендеді.
Инфляция бойынша болжам қандай?
Тамызда тұтыну бағалары 0,6%-ға өсті. Халықтың инфляциялық күтулері де төмендеді: шілдеде алдағы бір жылға болжам 12,1% болса, маусымда бұл көрсеткіш 13,4% болған.
Ұлттық банк 2026 жылдың қорытындысы бойынша инфляция 9–11% деңгейінде болады деп болжап отыр.
Ал 2027 жылға арналған болжам жоғары қарай қайта қаралды. Енді реттеуші инфляцияны 6,5–8,5% деңгейінде күтеді. Бұған дейінгі болжам 5,5–7,5% болатын.
Ұлттық банктің келесі базалық мөлшерлеме бойынша шешімі 2026 жылғы 23 қазанда жарияланады.
