Римде Қазақстанның Сауда және интеграция министрі Арман Шаққалиев пен Италия Сыртқы істер және халықаралық ынтымақтастық министрінің орынбасары Эдмондо Чириеллидің қатысуымен үкіметаралық жұмыс тобының 10-отырысы өтті.
Кездесуде өзара сауданы әртараптандыру, өнеркәсіптік кооперацияны дамыту, инвестициялық жобаларды іске асыру, энергетика, көлік және логистика, агроөнеркәсіп кешені салаларындағы ынтымақтастық мәселелері талқыланды.
2025 жылы Қазақстан мен Италия арасындағы тауар айналымы шамамен 16,9 млрд долларды құрады. Ал 2026 жылдың қаңтар–шілде айларында бұл көрсеткіш 9,79 млрд долларға жетті. Қазақстанның Италия нарығына қосымша экспорттық әлеуеті 307,5 млн долларға бағаланып отыр.
Сондай-ақ тараптар Транскаспий халықаралық көлік бағытын дамыту, Ақтау мен Құрық порттарының мүмкіндігін пайдалану, инвестиция тарту және қазақстандық өнімді Италия нарығына ілгерілету мәселелерін қарастырды.
Бұдан бөлек, ауыл шаруашылығы, экология, су ресурстары, туризм, спорт, мәдениет және білім салаларындағы байланысты нығайтуға уағдаласты.
