Оның айтуынша, оқырмандарынан Вьетнамның Камрань халықаралық әуежайында түсірілген фотосуреттер келіп түскен. Кадрларда Қайсар Камза Қазақстанға бағыт алған ұшақта отырғаны байқалады. Сондай-ақ журналист оның жанында Қазақстан Республикасының Қаржылық мониторинг агенттігінің қызметкері болуы мүмкін адам отырғанын жазған.
Еске салайық, Қайсар Камза 2026 жылдың қаңтарында халықаралық іздеуге жарияланған болатын. Тергеу нұсқасына сәйкес, ол Қазақстан аумағында тыйым салынған онлайн-казино қызметін жарнамалауға қатысы бар деген күдікке ілінген.
Ресми мәліметке сәйкес, блогер 400 мыңнан астам жазылушысы бар жабық Telegram-арна арқылы заңсыз құмар ойындарын насихаттады деген күдікке ілінген. Тергеу материалдарында онлайн-платформа лицензиясы бар букмекерлік кеңсенің атауын пайдаланғанымен, пайдаланушыларды заңмен тыйым салынған құмар ойындарына бағыттағаны айтылған.
Сондай-ақ тергеу барысында оның криптовалюталық әмияндарынан шамамен 200 мың АҚШ долларына тең қаражат анықталғаны хабарланды.
Құқық қорғау органдарының мәліметінше, аталған схема әшкереленгеннен кейін Қайсар Камза Оңтүстік-Шығыс Азия елдеріне кеткен. Кейін, 2026 жылдың сәуірінде Қазақстан Бас прокуратурасының сұрауы негізінде Вьетнамның құқық қорғау органдары оны ұстаған.
