
Қазақстанда энергия тиімділігін арттыру экономиканың бәсекеге қабілеттілігін күшейтудің маңызды бағытына айналды. Бұл ретте өндірістік кәсіпорындардағы энергия шығынын азайту, заманауи технологияларды енгізу және ресурстарды ұтымды пайдалану көзделген.
Өнеркәсіп және құрылыс министрлігінің 2026 жылғы 10 қыркүйектегі мәліметінше, 2025 жылдың қорытындысында Қазақстанның жалпы ішкі өнімінің энергия сыйымдылығы 2021 жылмен салыстырғанда 4 пайызға төмендеген. Мемлекеттік энергетикалық тізілімге 22 мыңнан астам ұйым енгізілген. Ал энергия аудиттері нәтижесінде өнеркәсіп кәсіпорындары 113,4 млрд теңгеге үнемдеу шараларын жүзеге асырып, 51,44 млрд теңге үнемдеген.
Мемлекет басшысы Қасым-Жомарт Тоқаев энергия тиімділігі саясатын түбегейлі қайта қарау қажеттігін атап өтіп, 2029 жылға қарай энергия тұтыну мен шығынға қатысты негізгі көрсеткіштерді кемінде 15 пайызға төмендетуді тапсырған. Өйткені энергия тиімділігін арттыру – өндіріс шығынын азайтып қана қоймай, елдің энергетикалық қауіпсіздігін нығайтудың маңызды шарты болып отыр.





