Қазақстан Энергетика министрлігі Алматы қаласындағы автогаз құю станцияларын сұйытылған мұнай газымен қамтамасыз ету жағдайына қатысты түсініктеме берді.
Министрліктің мәліметінше, өңірлерге сұйытылған мұнай газы жергілікті атқарушы органдар ұсынған қажеттілікке сәйкес бөлініп, бекітілген кесте бойынша жөнелтіледі.
Алматы қаласына тамыз айына 6 478 тонна сұйытылған мұнай газы қарастырылған. Бұл көлем қала әкімдігінің өтініміне толық сәйкес келеді және министрлік тарапынан толық қамтамасыз етілген.
Сонымен қатар, қалыптасқан жағдайға байланысты 4 тамыз күні Алматыға қосымша 1 512 тонна сұйытылған мұнай газы бөлінді. Қосымша көлемді жөнелту өндіруші зауыттармен және «Қазақстан темір жолы» ҰК» АҚ-мен бірлесіп жедел ұйымдастырылған.
Энергетика министрлігі өңірлерде жанар-жағармай мәселелері бойынша жедел штабтар жұмыс істейтінін еске салды. Олар бөлінген ресурсты қабылдап, автогаз құю станцияларына уақтылы жеткізуді қамтамасыз етеді, сондай-ақ газды сатуда үзілістердің алдын алу шараларын қабылдайды.
Ведомство Алматы әкімдігімен, өндіруші зауыттармен және тасымалдаушылармен бірлескен жұмысты жалғастырып жатқанын мәлімдеді.
