Батыс Қазақстан облысында құқық қорғау органдары мал ұрлау және оны заңдастырумен айналысқан ұйымдасқан қылмыстық топты анықтады.
Бас прокуратураның мәліметінше, топ мүшелері ұзақ уақыт бойы ауыл шаруашылығы жануарларын ұрлаумен айналысқан. Ұрланған малды кейін сату үшін арнайы «заңдастыру» тетігі қолданылған.
Тергеу деректеріне сәйкес, топ құрамында ветеринариялық мамандар да болған. Олардың көмегімен ұрланған мал дерекқорлар арқылы заңды ретінде рәсімделіп, кейін кедергісіз сатылған.
Құқық бұзушылықтар жасырын тергеу әрекеттері барысында анықталған. Қазіргі уақытта күдіктілер ұсталып, қамауға алынды.
Прокуратурада күдіктілердің тергеумен ынтымақтастық орнатып отырғаны атап өтілді. Тергеу жалғасып жатыр — қылмыстық схеманың барлық мән-жайы мен оған қатысы болуы мүмкін өзге де тұлғалар анықталуда.
