Алматы қаласында қаңғыбас жануарларды эвтаназиялауға қарсы өткен баспасөз конференциясында Аружан Саин айтқан пікір қоғамда қызу талқылауға себеп болды.
Баспасөз жиынында журналистер спикерлерге қаңғыбас иттердің шабуылынан балалардың қаза табу фактілерін мысалға келтіріп, «қайсысы маңызды – қаңғыбас иттердің өмірі ме, әлде балалардың өмірі ме?» деген сұрақ қойған.
Өз жауабында Аружан Саин мұндай қайғылы жағдайлар тек иттердің шабуылымен ғана шектелмейтінін айтып, балалар түрлі себептерден зардап шегетінін атап өтті.
«Өкінішке қарай, бүкіл әлемде балалар әртүрлі жағдайларда зардап шегеді. Балалар әскери қақтығыстарда да, тұрмыстық жағдайларда да, қылмыскерлердің қолынан да қаза табады. Біз балаларды толық қорғағымыз келеді, бірақ бәрінен толықтай қорғау әрдайым мүмкін емес», – деді ол.
Сонымен қатар, қоғам белсендісі мұндай жағдайларда ата-аналардың жауапкершілігі де маңызды екенін айтты. Оның пікірінше, балаларды қараусыз қалдырмау және қауіп болуы мүмкін жерлерден аулақ ұстау қажет.
«Бала, әсіресе кішкентай бала, қауіп төнуі мүмкін жерде болмауы тиіс. Бұл тек жануарларға қатысты емес, жалпы ересектердің жауапкершілігі», – деп атап өтті Аружан Саин.
Жануарларды қорғаушылар қазіргі шаралардың тиімсіздігіне қарамастан, қаңғыбас жануарларды эвтаназиялау әдісін қолдамайтынын жеткізді. Олар халық қауіпсіздігін қамтамасыз ету үшін негізгі шешім ретінде стерилизация мен жүйелі бақылауды ұсынды.
Алайда бұл пікір қоғамда екіұдай реакция тудырды. Бір тарап жануарларды қорғау қажеттігін қолдаса, екінші тарап балалар қауіпсіздігі бірінші орында тұруы тиіс екенін алға тартып отыр.
Қаңғыбас жануарлар мәселесі Қазақстанда соңғы жылдары өзекті тақырыптардың біріне айналып, қоғамда қызу пікірталас жалғасуда.
