Қазақстан Республикасының Премьер-министрі Олжас Бектенов Баку қаласында Түркі мемлекеттері ұйымына (ТМҰ) мүше елдер үкіметтері басшыларының екінші кездесуіне қатысып, Әзербайжан Президенті Ильхам Әлиевпен сауда-экономикалық ынтымақтастық пен бірлескен жобаларды талқылады.
Кездесуге Әзербайжан, Қырғызстан, Түркия, Өзбекстан үкіметтері мен ТМҰ Бас хатшысы қатысты. Қазақстан Премьер-министрі өңірлік және жаһандық сын-қатерлер жағдайында өзара іс-қимыл, сауда-экономикалық байланыстарды кеңейту, көлік инфрақұрылымын дамыту және энергетикалық қауіпсіздікті нығайту мәселелеріне ерекше мән берді.
Олжас Бектенов Қазақстан мен ТМҰ елдері арасындағы сауда көлемінің 2025 жылы $12,9 млрд-қа жеткенін атап өтіп, өзара инвестициялық және экономикалық ынтымақтастықты одан әрі тереңдетуге ниеттілігін білдірді. Сонымен қатар, Түркі елдерінің сауда-өнеркәсіп палаталары одағын күшейту, Цифрлық экономика саласындағы әріптестік келісімін ратификациялау және Түркістандағы «Тұран» арнайы экономикалық аймағында бірлескен өндірістерді дамыту жоспарланды.
Көлік-транзит саласында Орта дәлізді дамыту, Зангезур дәлізін және Транскаспий халықаралық бағытты жетілдіру мәселесі көтерілді. Сондай-ақ экологиялық шешімдер мен трансшекаралық энергетикалық инфрақұрылымды нығайтуға басымдық берілді.
Кездесу қорытындысы бойынша Бірлескен мәлімдеме қабылданып, Әзербайжанның ТМҰ төрағалығын қолдау және практикалық ынтымақтастықты одан әрі дамыту жөніндегі міндеттер бекітілді.
