Батыс Қазақстан облысында дала өртін сөндіру кезінде өрт сөндіру бөлімінің взвод командирі қаза тапты.
Оқиға 3-і қыркүйекте Жәнібек ауданында, «Татран» қыстауының маңында болған. Куәгерлердің айтуынша, өртті сөндіру кезінде өрт сөндіру көлігі қызметкерді басып кеткен. Ер адам ауыр жарақат алып, дәрігерлердің барлық әрекетіне қарамастан көз жұмған.
Куәгерлердің сөзінше, өрт орнындағы қою түтін салдарынан көріну мүмкіндігі өте төмен болған. Алдын ала мәлімет бойынша, өрт сөндіру көлігі артқа қарай қозғалған кезде жүргізуші түтін арасынан әріптесін байқамай қалған.
БҚО ТЖ департаменті қаза болған қызметкердің отбасына қажетті көмек пен қолдау көрсетіп, жерлеу рәсімін ұйымдастыруға жәрдемдескен.
Ведомствоның мәліметінше, оқиғаға қатысты барлық материал Батыс Қазақстан облысының полиция департаментіне берілген.
Видео: Алтай Бактыгалиев
