Қазақстанда мемлекеттік аудиттердің қорытындысы бойынша бюджет қаражатын пайдалану барысында ауқымды бұзушылықтар анықталды. Бұл туралы 2025 жылғы 24 желтоқсанда Мәжілістегі брифингте Жоғары аудиторлық палатаның төрағасы Әлихан Смайылов мәлімдеді.
Смайыловтың айтуынша, биыл 32 аудит аяқталған. Бұл өткен жылмен салыстырғанда көп, былтыр 27 аудит жүргізілген. Тексерулер 70 трлн теңгеден астам бюджет қаражатын қамтыды.
Нәтижесінде аудиторлар 2 трлн теңгеден астам бұзушылықты анықтады. Оның ішінде шамамен 500 млрд теңге қаржылық бұзушылықтарға тиесілі болса, 1,5 трлн теңгеден астамы бюджет қаражатын тиімсіз жоспарлау және пайдалану фактілері.
Тексеру қорытындысы бойынша 193 жеке және заңды тұлға әкімшілік жауапкершілікке тартылды. 204 лауазымды тұлғаға тәртіптік жаза қолданылды. Сонымен қатар қылмыстық құқықбұзушылық белгілері бар 70 материалды құқық қорғау органдарына жолдау туралы шешім қабылданды. Қазіргі таңда олардың 44-і жолданып, тағы 26 материал жіберу сатысында тұр.
