Президент Қасым-Жомарт Тоқаев отандық бизнесмендерге түзеу мекмелерінде жұмыс орындарын ашуды ұсынды. Ақорданың хабарлауынша, мемлекет басшысы бұл жайында құқық қорғау органдарының кеңейтілген алқа мәжілісінде айтты.
«Жазасын өтеп жүргендерді қалыпты өмірге дайындаудың тағы бір тиімді жолы – еңбекпен, яғни, жұмыспен қамту. Бұл бағытта біраз түйткілдер бар, нақты шаралар қолдану керек. Осы орайда біздің кәсіпкерлеріміз жазасын өтеу мекемелерінің жанынан түрлі кәсіпорын ашу мүмкіндігін қарастыруы керек деп ойлаймын. Мұндай серіктестік шетелде кең тараған. Бұл шараның екі жаққа да тигізер пайдасы мол. Жазасын өтеп жүргендердің тапқан табысы бостандыққа шыққан соң олардың қалыпты өмірге оралуына көмектеседі. Ал өндірісте меңгерген дағдысы жақсы жұмыс табуына жол ашады»-деді мемлекет басшысы.
Жалпы, бизнес өкілдері қылмыстық-атқару жүйесімен жан-жақты ықпалдастық орнату жолдарын мұқият саралағаны жөн. Мысалы, еліміздегі компанияның бірі өз қаржысын жұмсап, Алматыда кәмелет жасына толмаған құқық бұзушыларға арналған заманауи тәрбиелеу мекемесін салып жатыр. Үкімет мұндай тәсілді белсенді түрде қолдануы керек, басқа компанияларды осындай серіктестікке тарту қажет-деді Тоқаев.
Бүгінде ел түрмелерінде 30 мыңнан астам сотталушы жазасын өтеп жатыр. Парламент қарап жатқан Рақымшылық заңы күшіне енсе мыңдаған сотталушы бостандыққа шығады,кейбірінің жазасы жеңілдетіледі.
