Британдық Daily Mail газеті АҚШ президенті Дональд Трамп Гренландия тұрғындарына аралдың АҚШ құрамына қосылуын қолдап дауыс берген жағдайда әрқайсысына 1 миллион доллар ұсынуды ойластырып отырғанын хабарлады.
Басылым мәліметінше, Трамп қазіргі уақытта осындай бастаманы қарастырып жатыр. Гренландияда шамамен 57 мың адам тұрады. Алайда бұл ақпараттың ресми растамасы жоқ — Дональд Трамптың өзі мұндай мәлімдеме жасаған емес.
Бұған дейін Forbes журналы Трамптың дәулетін 4,9 миллиард доллар деп бағалаған. Сонымен қатар, Forbes тізіміне енген Қазақстанның кемінде бес азаматы АҚШ президентінен бай екені айтылған.
Жақында Трамп АҚШ пен НАТО Гренландияға қатысты келісімнің алдын ала шарттары бойынша уағдаласқанын мәлімдеді. Осыдан кейін ол бұрын сегіз еуропалық елге енгізілген кедендік баж салығын алып тастады.
Сонымен қатар, Дания билігі Гренландияны АҚШ-қа сату мәселесін талқылауға ниетті емес екенін мәлімдеді. Елдің сыртқы істер министрі Копенгаген өз қағидаттарынан бас тартуға дайын емес екенін атап өтті.
Ал Ресей президенті Владимир Путин Гренландияның ықтимал бағасы туралы пікір білдіріп, аралды Алясканы сатып алумен салыстырды.
