Парламент Мәжілісі отырысында ұялы байланыс тарифтерінің күрт өсу мәселесі көтерілді. Мәжіліс депутаты Нартай Сәрсенғалиев кейбір байланыс операторларында қызмет құны соңғы жылдары 300 пайызға дейін өскенін мәлімдеді.
Телекоммуникация нарығы мен деректерді өңдеу орталықтарын дамыту туралы заң жобасын талқылау кезінде депутат мобильді байланыс бағасының қымбаттауы қазақстандықтардың көптен бергі наразылығын туғызып отырғанын айтты.
«2022 жылдан бері тарифтер 20-дан 90 пайызға дейін өсті. Кейбір операторларда өсім 3 пайыздан 300 пайызға дейін жетті», — деді депутат.
Сәрсенғалиевтің айтуынша, операторлар тарифтерді өздері белгілей алады. Алайда мемлекет бағаның қаншалықты негізді көтерілгенін тексеретін бақылау тетіктеріне ие болуы керек.
Премьер-министрдің орынбасары — цифрлық даму және жасанды интеллект министрі Жаслан Мәдиев соңғы екі жылда әлеуметтік тарифтердің бағасы көтерілмегенін айтты.
Сонымен қатар министр байланыс қызметтері бағасының жалпы өскенін мойындады. Оның сөзінше, бұл:
– инфрақұрылымға салынған инвестициялармен;
– 5G желісін дамытумен;
– ауылдық елді мекендерді интернетке қосудың кеңеюімен байланысты.
Мәдиев сондай-ақ елдегі интернет-трафик тұтыну көлемі 70 пайызға артқанын мәлімдеді. Оның бағалауынша, бір гигабайттың құнын есептегенде байланыс қызметі шамамен 15 пайызға арзандаған.
«Биыл бір гигабайттың құны 82 теңгені құрап отыр», — деді министр.
Ведомство басшысы мобильді байланыс саласындағы монополияға қарсы бақылауды күшейтуді қолдайтынын да айтты.
