Астанада еліміздің барлық өңірінен келген мыңға жуық делегаттың қатысуымен жаңа «Әділет» саяси партиясының құрылтай съезі өтті.
Съезд барысында қатысушылар партияның жарғысын, бағдарламасын және жетекші органдарын бекітуді жоспарлап отыр. Бұл — партия қызметінің ресми басталуындағы маңызды кезең.
«Әділет» партиясының идеологиясы әділдік, патриотизм, жауапкершілік, еңбек және даму қағидаттарына негізделген. Партия өкілдерінің айтуынша, әділетті мемлекеттің басты іргетасы — «Заң мен Тәртіп» қағидаты болуы тиіс.
Саяси ұйым мамандыққа қарамастан еңбекақының әділ төленуіне қол жеткізуді көздейтінін мәлімдеді. Сондай-ақ Қазақстанның технологиялық және зияткерлік тәуелсіздігін дамыту қажеттігін алға тартады.
Бағдарламада денсаулық сақтау, білім беру, ғылым және креативті индустрия салаларына ерекше назар аударылған. Партия ұстанымында басты көрсеткіш есеп емес, адам денсаулығы болуы керек екені айтылған.
Сонымен қатар партия өңірлердің теңгерімді дамуын қолдап, сайлаушылар алдында тұрақты түрде жария есеп беру арқылы саяси жауапкершілікті күшейтуді ұсынады.
Ұйымдастырушылардың мәліметінше, партия тіркеу үшін қажетті межеден өткен — қазіргі таңда оның құрамында 9800-ден астам адам бар.
Жаңа саяси күштің құрылуы Қазақстандағы партиялық жүйенің трансформациясы мен саяси бәсекелестікті кеңейту бағыты аясында жүзеге асып отыр.
