Қазақстан Республикасының Атом энергиясы агенттігі барынша ашықтық қағидатын ұстанады. АЭС құрылысы мәселелері бойынша ынтымақтастықтың негізгі шарттары ашық дереккөздерде қолжетімді болады.
Алайда, жобаның технологиялық ерекшеліктері мен ауқымын, сондай-ақ АЭС салу бойынша халықаралық тәжірибені ескере отырып, жекелеген мәселелер құпиялылық туралы келісімдермен реттеледі, соған сәйкес кейбір ақпараттың таралуы шектеледі,-деп хабарлайды ведомстваның баспасөз қызметі.
Ал бұған дейін энергетика вице-министрі “Қазақстанда атом электр станциясының (АЭС) құрылысына кететін шығынды құпиялау мүмкіндігі қарастырылып жатыр”,- деген еді. Вице-министр Сұңғат Есімхановтың айтуынша, елдегі энергетикалық жобалар бойынша ақпарат, әдетте, ашық — тендерлер мен аукциондар жария түрде, бақылаушылардың қатысуымен өтеді. Алайда АЭС жағдайы бұл тұрғыда ерекшелік болуы мүмкін.
«АЭС бойынша мұндай ықтималдық бар. Бұл — ірі жоба, және, бәлкім, үкіметаралық келісім болады», — деді ол.
