Енді өзбекстандық блогерге іздеу жарияланды. Қазақстанда заңсыз онлайн-казиноларды жарнамалауға қатысы бар деген күдікпен Өзбекстан азаматы Махмуд Хикматов халықаралық іздеуде. Қаржылық мониторинг агенттігінің хабарлауынша, Махмуд Хикматов әлеуметтік желіде «Маха.dxb» атымен танымал болған.Тергеу нұсқасына сәйкес, ол «SultanGames», «PINCO», «Nomadcasino», «Pin-Up», «Vavada» сынды заңсыз интернет-казиноларды жарнамалау үшін Қазақстандағы блогерлерді тартқан.Хикматовқа 35-тен астам инфлюенсермен жұмыс істеген деген күдік бар. Олардың арасында жақында Вьетнамнан экстрадицияланған Қайсар Қамза да болған. Ол әлеуметтік желілерде интернет-казиноларға апаратын сілтемелерді жариялап, сыйақы алып отырған.Сот Махмуд Хикматовты қамауға алуға санкция берді. Қазір ол халықаралық іздеуде. Қаржылық мониторинг агенттігінің ресми өкілі Ернар Тайжанның хабарлауынша, Қазақстан аумағында интернет-казинолардың заңсыз жұмыс істеуіне жағдай жасайтын тұрақты жүйе құрылған. Осы жүйе арқылы интернет-казино интерфейсі ұсынылып, ақша қабылдау және төлеу жолға қойылған. Ол үшін эквайринг, мобильді төлемдер мен криптовалюта пайдаланылған. Сондай-ақ ел азаматтарын құмар ойындарға көптеп тарту мақсатында жарнама таратылған.Интернет-казиноларды жарнамалау үшін ұйымдастырушылар блогер М. У. Хикматовты тартқан. Оған Қазақстанда жұмыс істейтін инфлюенсерлерді тауып, солар арқылы жарнамалық материалдар жариялату міндеті жүктелген.
