Қазақстан Ұлттық Банкі «Қазақстанның жер қойнауы» сериясы аясында «Nb (ниобий)» атты жаңа коллекциялық монетаны айналымға шығарады. Монетаны 2026 жылғы 12 қазаннан бастап реттеушінің интернет-дүкенінен сатып алуға болады.
Монета 925 сынамалы күмістен жасалып, ниобий кірістірмесімен толықтырылған. Бұйымның жалпы салмағы — 32,8 грамм. Оның 31,1 грамы күміске, 1,7 грамы ниобийге тиесілі. Диаметрі — 38,61 миллиметр.
Монетаның номиналы — 1 000 теңге. Таралымы шектеулі: барлығы 1 000 дана шығарылады. Өндіріс кезінде proof сапа технологиясы қолданылған. Бұл әдіс бұйымның ұсақ бөлшектерін айқын көрсетіп, кейбір элементтеріне айнадай жылтыр береді.
Ниобий — атомдық нөмірі 41 болатын сирек металл. Ол металлургияда, электроникада, аэроғарыш және атом өнеркәсібінде қолданылады. Металл атауы ежелгі грек мифологиясындағы Танталдың қызы Ниобияның есімімен байланысты.
Монеталар Қазақстан теңге сарайында соғылған. Коллекциялық мақсатта шығарылғанына қарамастан, олар заңды төлем құралы болып саналады және Қазақстанның бүкіл аумағында номиналдық құны бойынша қабылдануға міндетті.
Жаңа монетаны Қазақстан Ұлттық Банкінің ресми интернет-дүкенінен сатып алуға болады.
