Алматы, 2026 жылғы 8 қараша. Алматы қаласында Халықаралық түркі мәдениеті ұйымы (ТҮРКСОЙ) мен «Түркі әлемінің халықаралық джиу-джитсу қауымдастығы» арасында ынтымақтастық туралы меморандумға қол қойылды. Бұл маңызды келісім түркі мемлекеттері арасындағы мәдени-гуманитарлық байланыстарды спорт саласындағы өзара ықпалдастықпен толықтырып, ортақ бастамаларды жүзеге асыруға жаңа мүмкіндіктер ашады.
Меморандумның басты мақсаты – түркі халықтары арасындағы ынтымақтастықты нығайту, джиу-джитсу мен грэпплинг спортын дамыту, халықаралық спорттық байланыстарды кеңейту және өскелең ұрпақтың бойында бірлік, тәртіп, отансүйгіштік пен өзара құрмет құндылықтарын қалыптастыру.
Салтанатты рәсімде құжатқа ТҮРКСОЙ Бас хатшысы Сұлтан Раев пен Қазақстан Халық Кеңесінің мүшесі, Түркі әлемінің халықаралық джиу-джитсу қауымдастығының Президенті Нұрсұлтан Орынбасаров қол қойды.
Іс-шараға ТҮРКСОЙ Бас хатшысы, Қырғыз Республикасының Халық жазушысы Сұлтан Раев, көрнекті ақын, ТҮРКСОЙ жанындағы Түркі әлемі жазушылар одағының төрағасы, Түркі әлемінің халықаралық джиу-джитсу қауымдастығының Құрметті Президенті Ұлықбек Есдәулет, Қазақстан Халық кеңесінің мүшесі, Қазақстанның еңбек сіңірген қайраткері, белгілі суретші-кескіндемеші, журналист және мәдениет саласының көрнекті өкілі Жанұзақ Мүсәпір, Қазақстан Халық кеңесінің мүшесі, Сағадат Нұрмағамбетов атындағы «Sagadat Batyr-QTT» спорт клубының негізін қалаушы, Түркі әлемінің халықаралық джиу-джитсу қауымдастығының Президенті Нұрсұлтан Орынбасаров қатысты.
Спорт – түркі халықтарын жақындастыратын ортақ құндылық
Түркі мемлекеттері арасындағы ынтымақтастықты дамытуда мәдениет пен рухани мұраның орны ерекше. Ал спорт – осы байланысты нығайтатын, мемлекеттер мен халықтарды ортақ мақсат төңірегіне біріктіретін маңызды бағыттардың бірі.
Осы тұрғыдан алғанда, ТҮРКСОЙ мен Түркі әлемінің халықаралық джиу-джитсу қауымдастығы арасындағы келісім тек спорттық серіктестік шеңберімен шектелмейді. Ол түркі жастарының өзара байланысын арттыруға, ортақ спорттық кеңістік қалыптастыруға және халықаралық деңгейдегі бірлескен жобаларды жүзеге асыруға бағытталған.
Жобаның негізгі бастамашыларының бірі – джиу-джитсудан қара белбеудің 2-дан иегері, тәжірибелі бапкер Нұрсұлтан Орынбасаров. Ол отандық жекпе-жек спортын дамытуға, кәсіби спортшылар даярлауға және халықаралық аренада Қазақстанның спорттық әлеуетін танытуға елеулі үлес қосып келеді.
Сонымен қатар, ол әскери-қолданбалы спорт бағытында да белсенді жұмыс жүргізіп, заманауи жекпе-жек әдістерін әскери қызметшілер мен арнайы бөлімшелердің дене дайындығында қолдану тәжірибесін дамытуға атсалысуда.
Сұлтан Раев: «Спорт – дипломатияның әмбебап тілі»
ТҮРКСОЙ Бас хатшысы Сұлтан Раев өз сөзінде ұйым қызметінің жаңа бағыттармен толығуы түркі халықтарының өзара ықпалдастығын одан әрі тереңдететінін атап өтті.
«ТҮРКСОЙ ондаған жыл бойы бауырлас халықтардың ортақ рухани және мәдени мұрасын сақтау мен насихаттау жолында маңызды қызмет атқарып келеді. Бүгінгі меморандум – осы ынтымақтастықтың жаңа белесі. Біз мәдени байланыстарды спорт саласындағы бірлескен бастамалармен толықтыруды көздейміз.
Спорт – шекараға бағынбайтын, халықтарды жақындастыратын және достықты нығайтатын әмбебап тіл. Джиу-джитсу сияқты заманауи спорт түрлерін дамыту арқылы түркі жастарының арасындағы өзара түсіністік пен бауырластықты жаңа деңгейге көтеруге мүмкіндік аламыз», – деді Сұлтан Раев.
Нұрсұлтан Орынбасаров: «Басты мақсатымыз – бірлігі бекем, рухы мықты ұрпақ тәрбиелеу»
Түркі әлемінің халықаралық джиу-джитсу қауымдастығының Президенті Нұрсұлтан Орынбасаров меморандумның тарихи және стратегиялық маңызына тоқталып, бұл бастама түркі мемлекеттері арасындағы ынтымақтастықтың нақты нәтижелерге бағытталған жаңа кезеңіне жол ашатынын жеткізді.
«Бүгінгі ТҮРКСОЙ ұйымымен қол қойылған меморандумды Түркі әлемінің болашағына бағытталған маңызды қадам деп санаймын.
Мемлекет басшысы Қасым-Жомарт Кемелұлы Тоқаев түркі мемлекеттері арасындағы ынтымақтастықты тереңдетудің, ортақ тарихи-мәдени мұраны сақтаудың және жастар арасындағы байланысты нығайтудың маңыздылығын үнемі атап өтіп келеді. Біз де осы стратегиялық бағытты негізге ала отырып, спортты халықтарды жақындастыратын маңызды құрал ретінде дамытуды мақсат етіп отырмыз.
Біздің басты міндетіміз – өскелең ұрпақтың бойында тәртіп, төзімділік, жауапкершілік, қайсарлық және отансүйгіштік қасиеттерді қалыптастыру. Джиу-джитсу – тек жекпе-жек өнері емес, ол мінезді шыңдайтын, адамды сабырлыққа, тәртіпке және құрметке тәрбиелейтін үлкен мектеп.
Сонымен қатар, спорттық дайындықтың әскери-қолданбалы бағыттағы маңызы да зор. Біз осы салалардағы тәжірибені ұштастыра отырып, жастар тәрбиесіне, ұлттық спорт әлеуетінің артуына және еліміздің халықаралық спорт кеңістігіндегі беделінің нығаюына үлес қосуды көздейміз.
Алдағы уақытта түркі мемлекеттерінің спорт ұйымдарымен бірлескен жобаларды жүзеге асырып, халықаралық жарыстар, оқу-жаттығу жиындары мен мәдени-спорттық іс-шаралар өткізуді жоспарлап отырмыз», – деді Нұрсұлтан Орынбасаров.
Ынтымақтастықтың жаңа бастамалары
Меморандум аясында ТҮРКСОЙ жанынан Спорт және этномәдениетті дамыту кеңесін құру, түркі мемлекеттері арасында спорттық байланыстарды жүйелі түрде дамыту және бірлескен халықаралық жобаларды іске асыру көзделіп отыр.
Сондай-ақ алдағы кезеңде «Түркі әлемі фестивалін» ұйымдастыру жоспарланған. Аталған фестиваль түркі халықтарының спорттық жетістіктерін, мәдени мұрасын және ортақ құндылықтарын кеңінен танытуға мүмкіндік беретін маңызды халықаралық алаңға айналмақ.
Бұл бастама Қазақстанның түркі интеграциясындағы белсенді рөлін айқындап қана қоймай, спорт дипломатиясын дамытудың да жаңа үлгісін қалыптастыруға ықпал етеді.
Алматыда қол қойылған меморандум – түркі халықтарының ортақ мұраты мен болашаққа деген ұмтылысын біріктіретін маңызды қадам. Оның басты нәтижесі – спорт арқылы жақындасқан, рухани байланысы нығайған және ортақ мақсаттарға жұмылған Түркі әлемінің жаңа буынын қалыптастыру.
