Астанада 30 жастағы әйелдің бұрынғы күйеуінің қолынан қаза табуына байланысты полиция қызметкерлеріне қатысты қатаң шаралар қабылданды.
Бұған дейін әйелдің бұрынғы күйеуі тарапынан қысым мен қорқытуға байланысты полицияға бірнеше рет жүгінгені белгілі болды. Атап айтқанда, 7 және 9 қыркүйекте ер адам әйелді пышақпен қорқытқаны туралы деректер бар. Әйелге қатысты қорғау нұсқамасы да шығарылған.
23 қыркүйекте әйел тұрғын үй ауласындағы автотұрақта бұрынғы күйеуінің шабуылынан қаза тапты. Күдікті ұсталып, уақытша ұстау изоляторына қамалды. Адам өлтіру фактісі бойынша қылмыстық іс тергеліп жатыр.
Осыдан кейін Ішкі істер министрлігінің Өзіндік қауіпсіздік департаменті әйелдің бұған дейінгі арыздарын қараған полиция қызметкерлерінің әрекетіне қызметтік тексеру жүргізді.
Тексеру нәтижесінде төрт полиция қызметкері теріс себептермен жұмыстан шығарылған. Олар — Сарыарқа аудандық полиция басқармасының тергеушісі мен учаскелік инспекторы және Нұра аудандық полиция басқармасының екі учаскелік инспекторы.
Сонымен қатар екі аудандық полиция басқармасының бастықтары мен олардың орынбасарлары, сондай-ақ Астана қаласы Полиция департаменті бастығының бір орынбасары қызметінен босатылды.
Ал Полиция департаментінің бастығы мен тағы бір орынбасары қатаң тәртіптік жауапкершілікке тартылды.
