Қазақстанда Теміржол көлігі қызметкерлері күніне орай Көлік министрлігінде салтанатты іс-шара өтті. Жиынға сала ардагерлері, теміржолшылар, еңбек әулеттерінің өкілдері мен көлік саласының басшылары қатысты.
Бүгінде елімізде теміржол саласында 110 мыңнан астам адам еңбек етеді. Соңғы бес жылда саладағы өндіріс көлемі 3,4 есеге өсіп, биыл 3,3 трлн теңгеге жетеді деп күтілуде. Сонымен қатар теміржол инфрақұрылымы жаңғыртылып, жаңа желілер салынып, вокзалдар мен жылжымалы құрам кезең-кезеңімен жаңартылып жатыр.
Соңғы бес жылда теміржол транзиті 20 млн тоннадан 33 млн тоннаға дейін ұлғайды. Ал жолаушылар тасымалын жақсарту мақсатында 650-ден астам вагон жаңартылып, биыл тағы 191 жаңа вагон жеткізіледі.
Салтанатты жиында теміржол саласының дамуына үлес қосқан 27 маман Көлік министрлігінің ведомстволық марапаттарына ие болды. Оның ішінде 19 қызметкер «Құрметті теміржолшы» төсбелгісімен марапатталды.
