Ақтөбе қаласында ауа райының күрт нашарлап, желдің екпіні секундына 30 метрге дейін жетуіне байланысты қалалық қызметтер дауыл салдарын жою жұмыстарын жүргізіп жатыр. Ресми мәліметке сәйкес, қала көшелерінде құлаған ағаштарды жинауға 10 мердігер ұйымның бригадалары мен арнайы техникалары жұмылдырылған. Жұмыстар Астана және Алматы аудандарындағы бірнеше учаскеде атқарылуда. Көпқабатты тұрғын үйлердің аула аумақтарындағы ағаштарды шығару жұмыстарын КСК және ОСИ өкілдері ұйымдастыруда.
Сондай-ақ дауыл салдарынан 2 көпқабатты тұрғын үй мен 5 жеке тұрғын үйдің шатыры зақымданғаны хабарланды. Электр желілерінде де ақаулар тіркелген. Қазіргі уақытта Ақтөбе қаласының бірнеше ауданында, сондай-ақ Қурайлы және Пригородный тұрғын алаптарында электр энергиясын қалпына келтіру жұмыстары жүргізілуде.
Мамандардың мәліметінше, апат салдарын жоюға 10 авариялық бригада мен арнайы техника тартылған.
